Նոր գիրք բժիշկների համար՝ «Բուժում է Վարդանանցը»
2022-11-03Օրերս տեղի ունեցավ «Բուժում է Վարդանանցը» գրքի շնորհանդեսը, որին ներկա էր բժշկական հանրությունը: Գրքի շուրջ 600 էջում ամփոփված են տարածված հիվանդությունների՝ ապացուցողական բժշկության վրա հիմնված ախտորոշման և բուժման ժամանակակից մոտեցումները։
«Վարդանանց» ՆԲԿ-ի գլխավոր տնօրեն, գրքի հեղինակային խմբի գիտական ղեկավար Հարություն Մանգոյանը «Victoria health news»-ի հետ զրույցում ասաց, որ գրքի հասցեատերը առաջնային օղակի բժիշկն է, որն ունի այս որակի տեղեկատվության կարիք. «Ամեն օր, երբ բժիշկը բուժում է իր հիվանդին, ուզում է վստահ լինել, որ օգտագործում է լավագույն միջազգային փորձը: Իսկ այս ամենի վերևում կանգնած է պացիենտը, ով ցանկանում է ստանալ լավագույն բուժում»: Հ. Մանգոյանի խոսքով, գրքի վրա աշխատել են շուրջ մեկ ու կես տարի. «Ընտրել ենք լավագույն աղբյուրները, թարգմանել և ադապտացրել. դրանից հետո ներդրել ենք «Վարդանանց» ՆԲԿ-ում, շուրջ 3 տարի աշխատել ենք, և միայն այս փուլերից հետո խիզախեցինք, որ կարող ենք կիսվել մասնագիտական հանրության հետ»:
ՀՀ առողջապահության նախարարության ընտանեկան բժշկության գծով խորհրդատու Սամվել Այրումյանը համոզված է, որ այս ձեռնարկը դառնալու է ընտանեկան բժիշկների սեղանի գիրքը: Վերջինս նկատեց, որ որակյալ բուժօգնություն տրամադրելուց բացի, գիրքը կպաշտպանի նաև բժշկին՝ նվազեցնելով վերջինիս սխալվելու հավանականությունը:
Առողջապահության ազգային ինստիտուտի ընտանեկան բժշկության ամբիոնի վարիչ, «Ընտանեկան բժիշկների հայկական ասոցիացիա»-ի նախագահ Սամվել Հովհաննիսյանը մեզ հետ զրույցում ասաց, որ արդեն ծանոթացել է գրքի հետ և բարձր է գնահատում նրա նշանակությունը. «Սպասված գիրք է, հայերեն լեզվով մենք այսպիսի գրականություն չունենք, արդիական է, որովհետև ընդհուպ մինչև վերջին՝ 2021 թ-ի տվյալներ են ներկայացված: Եվ ամենակարևորը, կա գրքի նաև էլեկտրոնային տաբերակը և հնարավոր կլինի միշտ այն թարմացնել»:
Շնորհանդեսին ներկա առաջնային օղակի թերապևտները և ընտանեկան բժիշկները «Բուժում է Վարդանանցը» գիրքը ստացան որպես նվեր: Գրքի շնորհանդեսին մասնակից բժիշկների համար ևս մեկ անակնալ էր պատրաստվել ՝ 1.000.000 դրամի ծածկույթով Մասնագիտական պատասխանատվության ապահովագրության անվանական սերտիֆիկատների տեսքով, որոնք բժիշկներին տրամադրեց «Ինգո Արմենիա» ապահովագրական ընկերությունը։
