«Victoria Health News»-ը ներկայացնում է միջազգային մամուլի անդրադարձը կորոնավիրուսի շուրջ ընթացող զարգացումների վերաբերյալ
«The Washington Post»
Չինաստանի առողջապահության պատասխանատուները նախազգուշացնում են, որ արագ տարածվող կորոնավիրուսով հիվանդ մարդը կարող է վարակել դիմացինին նախքան ախտանիշների առաջացումը: Կա մտավախություն, որ կարանտինը չի օգնի կանխելու հիվանդության տարածումը։ 17 քաղաք և 50 միլիոն մարդ այժմ գտնվում են կարանտինում, այս կերպ մասնագետները փորձում են կանխել համաճարակի բռնկումը, որն այժմ արդեն հասել է աշխարհի 11 երկիր: Մարդկանց տանը պահելու և այդ կերպ փոխանցման տեմպը դանդաղեցնելու նպատակով՝ Չինաստանը 3 օրով երկարաձգել է Լուսնային արձակուրդը։ Նշվում է նաև, որ Մոնղոլիան փակել է իր երկրի սահմանը Չինաստանի հետ: Ըստ վերջին տվյալների՝ Չինաստանում գրանցվել է կորոնավիրուսի 5997 և մահվան 132 դեպք: Երեք երկիր՝ Ֆրանսիան, Կանադան և Ավստրալիան, ուրբաթ օրը հաստատել են կորոնավիրուսի դեպքերը: Դեպքեր են գրանցվել նաև Թաիլանդում, Թայվանում, Ճապոնիայում, ԱՄՆ-ում, Վիետնամում, Սինգապուրում, Մալազիայում և Նեպալում։
«CNBC»
Այն բանից հետո, երբ Չինաստանը նախորդ շաբաթ հրաժարվեց միջազգային առողջապահական արտակարգ իրավիճակների մասին հայտարարությունից, Առողջապահության համաշխարհային կազմակերպության (ԱՀԿ) ղեկավար Թեդրոս Ադանոմ Ղեբրիեսոսը գործուղվեց Պեկին ՝ չինացի պաշտոնյաների հետ հանդիպելու համար:
«South China Morning Post»
Վայրի կենդանիների առևտուրը Չինաստանում արգելվել է մինչև համաճարակի ավարտը, որի տարածումը սկսվել էր Վուհանի ծովամթերքների շուկայից, որտեղ վաճառում էին նաև վայրի կենդանիներ:
«LinkedIn»
Համաճարակների կանխարգելման կենտրոնի (CDC) նախկին տնօրեն Թոմ Ֆրիդենը բարձրաձայնել է վերջին գիտական արդյունքների մասին, ըստ որոնց՝ չղջիկները ճանաչվել են որպես բռնկման հավանական աղբյուր։ Հաշվի առնելով վերջին զարգացումները, կորոնավիրուսը կարող է լինել ավելի քիչ մահացու, քան սուր շնչառական վարակները, բայց հնարավոր է ՝ ավելի վարակիչ է: