Նորություններ Հայաստանի առողջապահության, բժշկական կենտրոնների, բժիշկների եւ հայ բժշկության մասին


 Կորոնավիրուսի նոր տարբերակն ավելի վարակիչ է. վստահ են բրիտանացի փորձագետները

Կորոնավիրուսի նոր տարբերակն ավելի վարակիչ է. վստահ են բրիտանացի փորձագետները

2020-12-25

   Ըստ »Victoria health news»-ի, Միացյալ Թագավորությունում հայտնաբերվել է կորոնավիրուսի նոր, ավելի վարակիչ տարբերակը, որը կապված է վերջին շրջանում Անգլիայում հիվանդացության կտրուկ աճի հետ, այս մասին հաղորդում է CNN-ը:

   Նոր մուտացիան ստացել է VUI-202012/01 անվանումը: Մինչ գիտնականները շարունակում են նոր բացահայտումներ անել այս տարբերակի վերաբերյալ, դրա ազդեցությունն արդեն զգացվում է, և տասնյակ երկրներ սահմանափակումներ են մտցնում Մեծ Բրիտանիայից ժամանող մարդկանց համար:

Ի՞նչ պետք է իմանալ վիրուսի նոր տարբերակի մասին և  ինչո՞ւ  է  մասնագետներին այդքան մտահոգում  հենց  այս տարբերակը

  Վիրուսի մուտացիա տեղի է ունենում այն ժամանակ, երբ փոխվում է դրա գենետիկ կառուցվածքը։ Բոլոր վիրուսները ժամանակի ընթացքում մուտացվում են,  եւ ի հայտ են գալիս դրանց նոր ձևերը, բացառություն չէ նաև կորոնավիրուսը։

   Ինչպես եւ մյուս տարբերակները, այս մեկը ևս կրում է գենետիկ հետք, որը թույլ է տալիս հեշտությամբ հետեւել դրանում կատարվող փոփոխությունները։ Այս տեսակն այժմ լայնորեն տարածված է Հարավարեւելյան Անգլիայում, սակայն սա չի նշանակում, որ այն ավելի վարակիչ է կամ վտանգավոր, չնայած որ Մեծ Բրիտանիայի կառավարության առողջապահական ոլորտի խորհրդական-գիտնականները հաշվարկել են, որ կորոնավիրուսի նոր՝ մուտացված տարբերակի տարածման ինտենսիվությունը 70% -ով ավելի բարձր կարող է լինել, քան մյուսների դեպքում:

   Առողջապահության համաշխարհային կազմակերպությունը  հայտարարել է, որ վիրուսի նոր տարբերակում փոփոխությունները ներառում են 14 առանցքային մուտացիա, եւ որ դրանցից մի քանիսը  «կարող են ազդել մարդկանց շրջանում վիրուսի արագ փոխանցման վրա», և հավելել է, որ անհրաժեշտ են հետագա լաբորատոր հետազոտություններ:

   Nervtag-ի անդամ, գիտնական Նիլ Ֆերգյուսոնը  հայտարարել է, որ այս տարբերակը կարող է ավելի վարակիչ լինել երեխաների համար, սակայն հավելել է, որ ավելի շատ գիտական ապացույցներ են պահանջվում այս հարցում: Covid-19-ի՝ մեզ ծանոթ տարբերակի ծանր տանելիությունը դեռեւս հազվադեպ  երևույթ է երեխաների մոտ:

   Հետազոտության արդյունքները մեծ կարևորություն ունեն վիրուսների դեմ պայքարելու հարցում: ԱՀԿ-ի տվյալներով՝  նոր տարբերակը առաջին անգամ հայտնվել է Անգլիայում սեպտեմբերին և դանդաղ տարածում է գտել մինչեւ նոյեմբերի կեսեր։

   «Նոր տարբերակի դեպքերի թվի աճն առաջին անգամ ի հայտ է եկել նոյեմբերի վերջին, երբ Անգլիայի առողջապահության կազմակերպությունը հետազոտել է, թե ինչու Անգլիայի հարավ-արեւելքում՝  Քենթում,  վարակման մակարդակը չի նվազում, չնայած կարանտինային սահմանափակումներին: Այնուհետեւ մենք հայտնաբերեցինք վիրուսի նոր տարբերակի հետ կապված կլաստեր, որն արագորեն տարածվում է Լոնդոնում եւ Էսեքսում», - նշում է կազմակերպությունը։

   Անգլիայի գլխավոր բժիշկ Քրիս Ուիթթին  հայտնել է, որ նոր տարբերակը կազմում է Լոնդոնում վարակվածության դեպքերի 60%-ը: Դեպքերը կրկնապատկվել են վերջին շաբաթվա ընթացքում:

Ո՞ր երկրներն են վտանգված

   Մեծ Բրիտանիայից բացի, այդ տարբերակը հայտնաբերվել է նաեւ Դանիայում, Բելգիայում, Նիդեռլանդներում եւ Ավստրալիայում:

Արդյո՞ք նոր տարբերակն ավելի մահացու է

   Այս պահին չկա ոչ մի ապացույց, որ նոր տարբերակն ավելի մահացու է, չնայած դեռ վաղ է խոսել այդ մասին: Որոշ փորձագետներ նշում են, որ որոշ դեպքերում վիրուսի մուտացիաները, որոնք մեծացնում են դրա փոխանցելիությունը, պակաս մահացու են:

Արդյո՞ք մշակված պատվաստանյութերը կազդեն նոր տարբերակի վրա

   Ըստ փորձագետների և դեղարտադրողների՝ դեռ չկան ապացույցներ, որ ստեղծված պատվաստանյութերը  չեն ազդի վիրուսի նոր տարբերակի վրա։

   ԱՄՆ-ում կիրառման թույլտվություն ստացած՝ Pfizer/BioNTech-ի եւ Moderna ընկերությունների առաջին երկու պատվաստանյութերը այժմ փորձարկվում են, որպեսզի ստուգվի դրանց արդյունավետությունը կորոնավիրուսի մուտացված նոր տարբերակի դեմ:

Ի՞նչ միջոցներ են ձեռնարկվում նոր տարբերակի տարածումը  նվազեցնելու համար

   Լոնդոնը եւ Անգլիայի հարավ-արեւելյան շրջանները ներկայումս գտնվում են խիստ սահմանափակումների տակ, սակայն առողջապահության ոլորտի բրիտանացի փորձագետները ենթադրում են, որ այս տարբերակի դեմ պայքարելու համար լրացուցիչ սահմանափակումներ կարող են պահանջվել:

  Եվրոպայի, Մերձավոր Արեւելքի եւ Ամերիկայի տասնյակ երկրներ արդեն իսկ հայտարարել են դեպի Մեծ Բրիտանիա թռիչքների արգելման կամ այնտեղից ժամանող զբոսաշրջիկների համար թեստավորման եւ կարանտինի նոր պահանջների մասին:

   ԱՀԿ-ն հերթական անգամ հիշեցնում է վիրուսից պաշտպանվելու հիմնական միջոցների մասին. խուսափե՛ք վարակված մարդկանց հետ սերտ շփումից, հաճախ լվացե՛ք ձեռքերը եւ կրե՛ք դիմակ։


Բժշկական Նորություններ