Նոր ուսումնասիրություն. ո՞ւմից մարդը կարող է վարակվել COVID-19-ով
2021-01-20«Victoria health news»-ը ներկայացնում է հետազոտողների՝ COVID-19-ի հետ կապված վերջին բացահայտումները:
Մինչ համավարակը շարունակվում է, մենք ամեն օր նոր փաստեր ենք իմանում կորոնավիրուսի մասին: Հետազոտողները վերջերս հայտնաբերել են միաժամանակ թե՛ դրական և թե՛ բացասական փաստեր: Պարզվել է, որ մարդիկ, որոնք հիվանդացել են COVID-19-ով, իրենց օրգանիզմում արտադրված հակամարմինների շնորհիվ առավել երկար ժամանակով են վիրուսից պաշտպանված, քան նախկինում կարծում էին: Ուսումնասիրությամբ նաև պարզ է դարձել, որ չնայած նշված ժամանակահատվածում այս մարդիկ պաշտպանված են վիրուսից, սակայն նրանք դեռ կարող են վարակակիր լինել և վարակել դիմացինին:
Հակամարմիններ ունեցող մարդիկ դեռևս կարող են COVID-19-ի տարածող լինել
Հունվար ամսին Անգլիայի հանրային առողջության մասնագետների կողմից կատարված ուսումնասիրությունը, որը ստացել է Siren Study անվանումը, պարզել է, որ հակամարմիններ ունեցող մարդիկ դեռևս կարող են վիրուսը կրել իրենց քթի և կոկորդի մեջ և շրջապատի մարդկանց վարակել:
Էդինբուրգի համալսարանի իմունաբանության և վարակիչ հիվանդությունների գծով պրոֆեսոր Էլէանոր Ռայլին «Ռոյթերսին» հայտնել է, որ ներկայումս բոլոր մարդիկ մեկը մյուսի համար վարակի պոտենցիալ աղբյուր են և պետք է պահպանեն համավարակի կանոնները:
Հետազոտության համաձայն՝ COVID-19-ի նկատմամբ իմունիտետի որոշակի մակարդակը պահպանվում է վիրուսով վարակվելուց հետո առնվազն հինգ ամիս։ Այս պաշտպանությունը լիարժեք չէ, ինչը նշանակում է, որ քիչ, բայց հավանական է, որ այդ հինգ ամսվա ընթացքում դուք կրկին կվարակվեք:
Հետազոտողները նախազգուշացնում են․ նրանք, ովքեր առաջին ալիքի ժամանակ վարակվել են COVID-19-ով, հինգ ամիս անց կարող են կրկին խոցելի լինել:
COVID-19-ով վարակվելուց հետո պաշտպանվածության մակարդակը 83 տոկոս է
Ուսումնասիրության ընթացքում պարզվել է, որ COVID-19-ով վարակվելուց հետո կրկնավարակից օրգանիզմի պաշտպանվածությունը 83 տոկոս է կազմում, համեմատած այն մարդկանց հետ, ովքեր դեռևս չեն հիվանդացել: Իսկ վերջին պատվաստանյութերի շնորհիվ պաշտպանվածության մակարդակը հասնում է մինչև 94-95 տոկոսի։
«Մենք այժմ գիտենք, որ վիրուսակիրներից և պատվաստանյութերի միջոցով հակամարմիններ ստացած մարդկանցից շատերը պաշտպանված են կրկնավարակից, սակայն դեռ չգիտենք, թե որքան է տևում պաշտպանությունը», - նշում է հետազոտության գլխավոր ղեկավար Սյուզան Հոփքինսը։
Այդ տոկոսային թիվը ստանալու համար հետազոտողները հունիսի 18-ից նոյեմբերի 24-ն ընկած ժամանակահատվածում ուսումնասիրել են թվով 6,614 COVID-19-ով հիվանդի և հայտնաբերել կրկնավարակի 44 հավանական դեպք: Երկու հիվանդ, որոնց մոտ «հավանական» կրկնավարակ էր գրանցվել, նշում էին, որ ախտանշանները ավելի թույլ են արտահայտված եղել, քան առաջին անգամ COVID-19-ով վարակվելու ընթացքում:
Այս բացահայտումները հաստատում են նախազգուշական միջոցներ ձեռնարկելու անհրաժեշտությունը, նույնիսկ նրանք, ովքեր արդեն իսկ վարակվել են COVID-19-ով:
Շատ կարևոր է, որ վիրուսի հանդեպ իմունիտետ ունեցող մարդիկ շարունակեն անհրաժեշտ նախազգուշական միջոցներ ձեռնարկել՝ ուրիշներին չվարակելու համար:
Մի՛ մոռացեք պարբերաբար լվանալ ձեռքերը, կրել դիմակ և պահպանել սոցիալական հեռավորությունը՝ վիրուսի փոխանցման հավանականությունը նվազեցնելու համար:
