Ի՞նչ տարբերություններ կան վիրաբուժական դիմակի և շնչառական N95 դիմակի միջև: Այս հարցը 2020 թ-ից մինչ այսօր շատ արդիական է։ Չնայած այն հանգամանքին, որ երկու պաշտպանիչ միջոցն էլ կոչվում է «դիմակ», սակայն դրանք օգտագործվում են տարբեր գործառույթների համար: Վիրաբուժական դիմակները և N95 շնչառական միջոցները տարբեր տեսակի դիմակներ են և տարբերվում են իրարից նույնիսկ նրանով, թե ինչպես են դրանք համապատասխանեցվում այն կրողի դեմքին:
«Victoria health news»-ը ներկայացնում է «Occupational health & safety» ամերիկյան կայքում հրապարակված հոդվածը, որտեղ ներկայացվում է, թե որ դիմակը ինչի համար է նախատեսված:
Վիրաբուժական դիմակներ
ԱՄՆ-ի սննդի և դեղորայքի տեսչությունը (FDA)- ն նշում է. «Վիրաբուժական դիմակը դեմքին ազատ նստող, մեկանգամյա օգտագործման դիմակ է, որը ֆիզիկական խոչընդոտ է ստեղծում այն կրողի բերանի, քթի և միջավայրի պոտենցիալ աղտոտիչների միջև»: Վիրաբուժական դիմակը կարված է այնպես, որպեսզի կանխի օրգանիզմից հեղուկ մասնիկների (արյուն, խորխ) արտանետումը։ FDA- ն հավելում է սակայն, որ այն չի զտում և չի խոչընդոտում օդում գտնվող շատ այլ փոքր մասնիկների փոխանցումը մարդուն հազի, փռշտոցի կամ որոշակի այլ միջոցներով։
Վիրաբուժական դիմակները նախատեսված են բերանը և քիթը ծածկելու համար և արտադրվում են ստանդարտ չափսերով: Վիրաբուժական դիմակի և N95 ֆիլտրող դիմակի հիմնական տարբերություններից մեկն այն է, որ վիրաբուժական դիմակները նախատեսված չեն շնչառական պաշտպանություն ապահովելու համար, քանի որ դրանք արդյունավետ կերպով չեն զտում օդի փոքր մասնիկները: Բացի այդ, վիրաբուժական դիմակները չեն համապատասխանում N95 կամ ավելի բարձրորակ շնչառական միջոցների ստանդարտներին: Ընդհանուր առմամբ, վիրաբուժական դիմակները նախատեսված չեն այն կրողին օդում գտնվող մանր մասնիկներից պաշտպանելու համար, այլ ավելի շուտ պաշտպանում են վիրահատական տարածքի օդի մաքրությունը շնչառության միջոցով փոխանցվող մասնիկներից։
Պետք է նշել, որ վիրաբուժական դիմակները չպետք է շփոթել այլ տեսակի կտորից կարված դիմակների հետ, որոնք լայն տարածում են գտել COVID-19 համավարակի ֆոնին։ Դրանք չեն պահանջում FDA-ի կողմից հաստատում և չեն ապահովում նույն տեսակի պաշտպանություն:
N95 շնչառական միջոցներ
N95 շնչառական միջոցները նախատեսված են օդով փոխանցվող մասնիկների՝ արդյունավետ կերպով զտում կատարելու համար դրանց՝ դեմքի հետ շատ սերտ շփման հաշվին: Ճիշտ կիրառելու դեպքում N95 շնչառական դիմակը զգալիորեն կնվազեցնի այն կրող մարդու շնչուղիներ ներթափանցող փոքր մասնիկների քանակը` ի տարբերություն վիրաբուժական դիմակի: Ֆիլտրման արդյունավետությունը կազմում է 95% -ից մինչև 99,97%, կախված օդում գտնվող վտանգավոր մասնիկների չափսերից և դիմակը ճիշտ կրելու ձևից:
Գոյություն ունեն N95 դիմակների երկու հիմնական տեսակներ՝ վիրաբուժական
և արդյունաբերական: Թե՛ N95 վիրաբուժական շնչառական միջոցները և թե՛ N95 արդյունաբերական շնչառական միջոցները ապահովում
են տարբեր տեսակի պաշտպանություն` ըստ նախատեսվածի։
Վիրաբուժական շնչառական N95
N95 վիրաբուժական շնչառական միջոցները նախատեսված են առողջապահական հաստատություններում կիրառելու համար և նախատեսված են ոչ միայն մարդուն օդակաթիլային կենսաբանական աղտոտիչներից պաշտպանելու համար, այլ նաև լրացուցիչ պաշտպանություն են ապահովում օդով փոխանցվող այլ հեղուկ մասնիկներից։
Վիրաբուժական N95-ի և արդյունաբերական N95-ի միջև կա երկու հիմնական տարբերություն: Նախ, վիրաբուժական N95 դիմակները պետք է հաստատված լինեն FDA- ի կողմից և երկրորդ, վիրաբուժական N95 դիմակները անցնում են ստուգման փուլեր, որպեսզի հաստատվի, որ դրանք չեն առաջացնում մաշկի գրգռում կամ ալերգիա:
Արդյունաբերական շնչառական N95
N95 արդյունաբերական շնչառական միջոցները նախատեսված են մետաղամշակման, շինարարության և հանքարդյունաբերության ոլորտներում օգտագործելու համար և FDA հաստատում չեն պահանջում։ Ինպես N95 վիրաբուժական շնչառական դիմակները, արդյունաբերական N95 շնչառական միջոցները ևս պետք է ամուր դիպչեն այն կրողի դեմքին, առավել արդյունավետ պաշտպանության համար:
Չնայած N95 վիրաբուժական և N95 արդյունաբերական շնչառական միջոցների կիրառության ոլորտները տարբեր են, սակայն COVID-19-ի համավարակի ընթացքում N95 արդյունաբերական շնչառական միջոցները հաստատվել են պոլիկլինիկաներում օգտագործելու համար:
Իհարկե, բարդ է գտնել բժշկական դիմակների և N95 շնչառական միջոցների միջև տարբերություն, սակայն եթե հասկանանք դրանցից յուրաքանչյուրի հիմնական առանձնահատկությունները, կկարողանանք կիրառել դրանք ըստ նշանակության։