Այսօր Առողջապահության նախարար Անահիտ Ավանեսյանը լրագրողների հետ հանդիպմանը ներկայացրեց, թե որ փուլում է կորոնավիրուսային հիվանդության դեմ պատվաստումների ձեռքբերման և կիրառման գործընթացը:
Այս պահին Հայաստանում առկա է 2 պատվաստանյութ՝ «AstraZeneca» և «Sputnik V»: Առողջապահության նախարարի խոսքով, չի բացառվում, որ առաջիկայում Հայաստանը ձեռք կբերի նաև այլ ընկերությունների պատվաստանյութեր, մասնավորապես չինական «SinoVac»-ը:
Ապրիլի 8-ին Հայաստան է ներկրվել կորոնավիրուսային հիվանդության դեմ ռուսական «Sputnik V» պատվաստանյութի 15 000 դեղաչափ՝ 7500 անձի համար:
Հիշեցնենք, որ վերջերս «COVAX FACILITY» նախաձեռնության միջոցով ներկրվել է նաև «AstraZeneca» ընկերության պատվաստանյութը՝ 24 000 դեղաչափ:
Ըստ նախարարի, ընտրվել են այն թիրախային խմբերը, որոնք կպատվաստվեն առաջին փուլում: Ռիսկի այդ խմբերում են բուժաշխատողները, 65 տարեկան և բարձր տարիքի անձինք, քրոնիկ հիվանդները, տարեցների խնամքի կենտրոնների բնակիչները և աշխատակիցները, սոցիալական խնամքի կենտրոնների աշխատակիցները:
«AstraZeneca» -ով կպատվաստվեն 55-ից բարձր տարիքի անձինք
Հաշվի առնելով Եվրոպական դեղերի գործակալության և Առողջապահության համաշխարհային կազմակերպության կողմից «AstraZeneca» պատվաստանյութի վերաբերյալ տարածված հայտարարությունը՝ պատվաստանյութի և թրոմբոէմբոլիկ բարդությունների միջև հավանական կապի վերաբերյալ, ինչպես նաև ՀՀ ներկրված «Sputnik V» պատվաստանյութի սահմանափակ քանակությունը՝ անհրաժեշտություն է առաջացել սահմանել ռիսկի խմբերում դրանց կիրառման տարիքային որոշակի սահմանափակումներ:
Ռիսկի խմբերի շրջանում պատվաստումային գործընթացի ռիսկերը նվազեցնելու համար, «AstraZeneca» պատվաստանյութը կիրառվելու է հետևյալ ռիսկի խմբերի շրջանում.
65 տարեկան և բարձր տարիքի անձինք,
Բուժաշխատողներ՝ 55 տարեկան և բարձր տարիքի անձինք,
Քրոնիկ հիվանդներ՝ 55 տարեկան և բարձր տարիքի անձինք,
Սոցիալական խնամքի կենտրոնների բնակիչներ և աշխատակիցներ՝ 55 տարեկան և բարձր տարիքի անձինք
«Sputnik V» -ով պատվաստվելու են 18-54 տարեկան անձինք
«Sputnik V» պատվաստանյութը նպատակահարմար է կիրառել հետևյալ ռիսկի խմբերի շրջանում.
Բուժաշխատողներ՝ 18-54 տարեկան անձինք (ներառյալ)
Քրոնիկ հիվանդներ՝ 18-54 տարեկան անձինք (ներառյալ)
Սոցիալական խնամքի կենտրոնների բնակիչներ և աշխատակիցներ՝ 18-54 տարեկան անձինք (ներառյալ)
«AstraZeneca»-ով պատվաստումները կմեկնարկի ապրիլի 13-ից
«AstraZeneca» պատվաստանյութն այսօրվանից բաշխվելու է բժշկական օգնություն և սպասարկում իրականացվող կազմակերպություններին, իսկ մարզերի բժշկական կազմակերպություններին՝ ապրիլի 12-13-ը:
«Sputnik V» պատվաստանյութի հետ կապված դեռևս իրականացվում են փաստաթղթային ձևակերպումներ, նախատեսվում է այն ավարտել մինչև շաբաթվա վերջ, իսկ բաշխումը կսկսվի մյուս շաբաթվա առաջին օրերին:
«AstraZeneca»-ով պատվաստումները Երևանում կմեկնարկի ապրիլի 13-ից, իսկ մարզերում՝ ապրիլի 14-ից:
Պատվաստումներն իրականացվելու են պետական պատվերի շրջանակներում և բացառապես կամավորության սկզբունքով: