Հունիսի 26-ը թմրանյութերից կախվածության և ապօրինի շրջանառության դեմ պայքարի միջազգային օրն է: Այս տարվա կարգախոսն է՝ «Կիսվիր փաստերով, փրկիր կյանքեր»:
«Մենք թմրանյութերի դեմ» ՀԿ-ն ՀՀ ԱՆ Կախվածությունների բուժման ազգային կենտրոնի և ԱՍՀՆ Երևանի «Զատիկ» երեխաների աջակցության կենտրոնի հետ համատեղ կազմակերպել էր՝ «Ավելի շատ իմացություն ավելի արդյունավետ կանխարգելման համար» խորագրով գիտաժողով:
«Մենք թմրանյութերի դեմ» ՀԿ-ի ծրագրերի ղեկավար Կարոլինա Սահակյանը մեզ հետ զրույցում նշեց, որ ՀԿ-ն հիմնադրվել է 2019 թ-ին: Գործունեության ուղղությունները վեբինարներն են և տարբեր թեմատիկ միջոցառումները: Նպատակը՝ հասարակության իրազեկման բարձրացումն է՝ թմրամիջոցների վնասկար և կործանարար հետևանքների հետ կապված: Դա անում են կրթական, մշակութային, սպորտային և առողջապահական ծրագրերի միջոցով:
«Այս 2 տարվա մեջ իրականցրել ենք 10 մասնագիտական վեբինար, որին մասնակցել են 500 հոգի: Այս տարի եռօրյա ծրագիր է: Առաջիկայում, նախնական համաձայնությամբ իրականցնելու ենք 2 ծրագիր, մեկը քաղաքապետարանի հետ համատեղ՝ Երևանի կամարանցումներում թեմատիկ իրազեկման գրաֆիտիներ ենք անելու և 2-րդը՝ ավագ դպրոցների երեխաների ծնողների համար առաջին օգնության իրազեկման ծրագրեր»,-նշեց նա:
Հաշվառված թմրամիջոց օգտագործողների քանակն այս պահի դրությամբ Հայաստանում կազմում է մոտ 7500 հոգի, որից 150-ը կին է: Տարիքային խմբերը գերազանցապես կազմում են 30-ից մինչև 50 տարեկան անձինք:
«Պետք է հաշվի առնենք այն հանգամանքը, որ թմրամիջոց օգտագործողների պաշտոնական թիվը ամբողջությամբ չի արտահայտում իրական պատկերը, որովհետև մարդիկ խուսափում են և չեն դիմում բժշկական հաստատություններ՝ հաշվառման նպատակով»-, ասաց ԱՆ թմրաբանության գծով խորհրդատու, ԱՆ Կախվածությունների բուժման ազգային կենտրոնի տնօրեն Սուրեն Նազինյանը:
Կախվածություն ունեցող անձանց բուժումը, թմրամիջոցներից թե այլ հոգեմետ միջոցներից, ՀՀ քաղաքացիների համար իրականացվում է պետության կողմից երաշխավորված անվճար բուժօգնության շրջանակներում:
«Մենք հիմա ամեն ինչ անում ենք, որ բուժման արդյունավետությունը և որակը հնարավորինս բարձր մակարդակի վրա լինի: Ինչի համար վերջին տարիներին ներդրել ենք սոցիալ-հոգեբանական ծառայություն, որը միջազգայնորեն ընդունված, ԱՀԿ-ի կողմից առաջարկվող մոտեցում է: Այսինքն՝ դեղորքայքային բուժմանը զուգահեռ՝ պացիենտներին, երբեմն էլ նաև նրանց ընտանիքի անդամներին, տրվում է ուժեղ և ինտեսիվ սոցիալ-հոգեբանական աջակցություն»,- նշեց Սուրեն Նազինյանը:
Թմրանյութային կախվածությունը շատ հաճախ պատճառ է դառնում ընտանիքներից՝ երեխաների բաժանման ու մեկուսացման։
«Զատիկ» երեխաների աջակցության կենտրոնը տրամադրում է սոցիալ-հոգեբանական աջակցություն թմրանյութերից կախվածություն ունեցող և թմրանյութ օգտագործող դեռահասներին, ինչպես նաև թմրանյութ օգտագործող ծնողներին:
«Կարևորում ենք այս գիտաժողովին մասնակցությունը, որովհետև մեր կենտրոնի կարևորագույն նպատակներից է նաև երեխաների և ընտանիքների վերամիավորումը», ասաց ՀՀ ԱՍՀՆ «Զատիկ» երեխաների աջակցության կենտրոնի տնօրեն Սիրանույշ Անտոնյանը:
«Ուրախալի է, որ թեման ինքնին դարձել է բաց և քննարկելի: Փոխվել է վերաբերմունքը թմրանյութեր օգտագործող մարդկանց նկատմամբ: Եթե առաջ նրանք ընկալվում էին որպես հակահասարակական անուղղելի էակներ, հիմա թմրանյութային կախվածություն ունեցող անձանց ավելի շատ ընկալում են մարդիկ, որոնք ունեն սոցիալական, բժշկական, հոգեբանական աջակցության կարիք և նրանք կարող են փոխվել, հաղթահարել այդ ճանապարհը և լիարժեք սոցիալականացվել»,- ընդգծեց Սիրանույշ Անտոնյանը:
Նա նշեց նաև, որ նկատելի է մարդկանց դիմելիության դրական տեղաշարժ, որը կապված է աջակցող կառույցների նկատմամբ օրեցօր աճող վստահությամբ:
Նշենք, որ գիտաժողովին ներկայացվեց 20 զեկույց: