Լավագույն լուծումը կանխարգելումն է
2021-07-06«Ակնաբուժությունը Հայաստանում համարվում է բավականին զարգացած ճյուղ: Հայաստանում արվում են ժամանակակից գրեթե բոլոր վիրահատությունները և բավականին բարձր մակարդակով: Սակայն ինչպես բժշկության մյուս ճյուղերը, ակնաբուժությունն էլ ունի իր խնդիրները»,- «Victoria health news»-ի հետ զրույցում ասաց ակնաբույժ Գևորգ Բարաղամյանը:
«Քանաքեռ-Զեյթուն» ԲԿ-ի Ակնաբուժական կլինիկայի աչքի անոթային բաժանմունքի վարիչ Գևորգ Բարաղամյանը, օրական կատարելով մեծաքանակ վիրահատություններ, առնչվելով ակնաբուժական տարբեր խնդիրներ ունեցող բազմաթիվ բուժառուների հետ, կարծում է, որ հնարավոր է ազգաբնակչության շրջանում նվազեցնել բարդացման փուլի հասած ակնաբուժական մի շարք հիվանդություններ՝ զարգացնելով առաջնային օղակն ու ներդնելով գործող մեխանիզմներ:
Նրա խոսքով, Հայաստանում մարդիկ բժշկի են դիմում այն ժամանակ, երբ արդեն հիվանդությունը գտնվում է ծանր փուլում, որի ժամանակ բուժօգնությունն անգամ անօգուտ է դառնում, որովհետև հնարավոր չի լինում բարձրացնել հիվանդի կյանքի որակը:
«Մեզանում, սովորաբար, մարդը դիմում է բժշկի, երբ արդեն ունի գանգատ: Օրինակ, վատ տեսողությունը, հաճախ, մարդիկ վերագրում են տարիքին՝ համարելով, որ նորմալ երևույթ է, այն ինչ նրանց մոտ կարող է հայտանբերվել ուշացած գլաուկոմա կամ հատակի այլ խնդիր, կամ էլ դիաբետի հետ կապված ինչ-ինչ բարդություններ: Իսկ նման դեպքերում, ուղղակի հնարավոր չի լինում լիարժեք օգնություն ցուցաբերել»-ասաց Գևորգ Բարաղամյանը:
Գլաուկոման այն հիվանդությունն է, որի գոյության մասին մարդն իմանում է այն ժամանակ, երբ հիվանդությունը գտնվում է արդեն 3-րդ փուլում, քանի որ մինչ այդ հիվանդությունն իրեն զգացնել չի տալիս:
Ըստ նրա, աշխարհում արդեն իսկ կան արդյունավետ մեթոդներ, որոնք կարող են կիրառվել Հայաստանում. «Եվրոպական երկրներում, օրինակ, բոլորն ունեն բժշկական ապահովագրություն և նրանք տարեկան գոնե 1 անգամ պետք է անցնեն պարտադիր բուժզննում: Կամ եթե յուրաքանչյուր 6 ամիսը մեկ թոշակառուն չի դիմում ակնաբույժի՝ զրկվում է վարորդական իրավունքից: Դրա լավն այն է, որ հիվանդությունն հայտնաբերվում է վաղ փուլում և հնարավոր է լինում կանխարգելել այն: Դրա շնորհիվ է, որ հաշմանդամության կամ բարդացած դեպքերը այնտեղ քիչ են»:
Գևորգ Բարաղամյանի կարծիքով, այս խնդիրը լուծելի է, պարզապես պետք է կատարվեն համակարգային փոփոխություններ և ներդրվեն հատուկ մեխանիզմներ. «Պետք է ամրացնենք առաջնային օղակը, որը, համոզված եմ, կկարողանա ցուցաբերել որակյալ բուժօգնություն և միայն անհրաժեշտության դեպքում հիվանդները կուղղորդվեն նեղ մասնագետների մոտ»,-եզրափակեց նա:
