Սույն թվականի օգոստոսի 6-ին կառավարությունը հավանություն տվեց Կայունացման և զարգացման Եվրասիական հիմնադրամի միջոցներից «ՀՀ-ում COVID-19 համավարակին պատրաստվածության մակարադակի բարձրացում. կորոնավիրուսից առաջացող սպառնալիքի հայտնաբերում և արձագանքում» ծրագրի ֆինանսավորման համար դրամաշնորհի տրամադրման մասին ՀՀ և Եվրասիական զարգացման բանկի միջև համաձայնագրի ստորագրման առաջարկությունը:
ՀՀ առողջապահության նախարար Անահիտ Ավանեսյանը մանրամասնեց, որ սույն համաձայնագրի շրջանակներում նախատեսվում է Հայաստանի Հանրապետությանը տրամադրել 3 միլիոն դոլար դրամաշնորհ, որն ուղղվելու է առողջապահական համակարգի հզորացմանը, արդիականացմանը. «Ինչպես ամբողջ աշխարհում, այնպես էլ ՀՀ-ում դեռ շարունակվում է կորոնավիրուսային վարակի դեպքերի ալիքաձև աճը: Հիվանդությանը դիմակայելու, արագ արձագանքելու և հիվանդներին պատշաճ օգնություն տրամադրելու համար անհրաժեշտ է համակարգը անընդհատ արդիականցնել և մենք կորոնավիրուսային վարակը դիտարկելով մարտահրավեր նաև դիտարկել ենք որպես առիթ մեր համակարգում լրացուցիչ ներդրումներ անելու և պատրաստվածության աստիճանը բարձրացնելու և պատրաստ լինելու նաև այլ մարտահրավերների դիմակայելու համար»-ասաց Անահիտ Ավանեսյանը:
Նախարարի խոսքով, այս դրամաշնորհի շրջանակներում նախատեսվում է Հիվանդությունների վերահսկման և կանխարգելման ազգային կենտրոնի 2 մարզային կենտրոնների՝ Արմավիրի և Արարատի մասնաճյուղերի ամբողջական վերակառուցում և վերազինում և Լոռու մարզի Վանաձորի ԲԿ-ին կից ինֆեկցիոն նոր մասնաշենքի կառուցում և համալրում:
Կարևորելով այս նախաձեռնությունը առողջապաահության նախարարն ասաց. «Այս ծրագրի շրջանակներում մենք կունենանք ամբողջական համակարգված հիվանդությունների վերհսկման և կանխարգելման ազգային կենտրոնի ազգային ցանց, որովհետև մյուս 5 մասնաճյուղերը արդեն իսկ վերանորոգվել և վերազինվել են և նորագույն պայմաններին համապատասխան ինֆեկցիոն բաժանմունք»:
Անդրադառնալով աշնանը սպասվող կորոնովիրուսի տարածման աճին, ասաց, որ վարակի աճը զսպելու համար՝ ամենագործուն միջոցը պատվաստումն է:
Նախարարը գոհունակություն հայտնեց պատվաստման ցուցանիշներից: Օգոստոսի 5-ի տվյալներով 196036 պատվաստում է արվել: Կատարվել է նաև տարբերակված նմուշառում և հայտնաբերվել է 25 դելտա շտամ, և 5 բրիտանական:
Հուլիսի 15-ից էլ վարվում է առանձին վիճակագրություն, ըստ որի, մինչև օոգոստոս 4-ը 58108 պատվաստված անձից 56010 ը ՀՀ քաղաքացի է, իսկ 2096-ը՝ օտարերկրյա: