COVID-19- ի կանխարգելմանն ուղղված նոր միջոցառումներ չպատվաստված ամերիկացիների վրա
2021-09-09Սպիտակ տունը հայտնում է, որ ԱՄՆ նախագահ Բայդենը հինգշաբթի կհայտարարի իր վարչակազմի կողմից COVID-19-ի կանխարգելմանն ուղղված նոր քայլերի մասին, որոնց մեջ ներառված են՝ թեստավորումը, իրավունքները և դպրոցական միջոցառումները՝ հիմնված մարդու պատվաստման կարգավիճակի վրա, ըստ «Victoria helath news»-ի, այս մասին գրում է ամերիկյան «NewsBreak» լրատվական կայքը:
Կայքը հիշեցնում է՝ Սպիտակ տան խոսնակ Ջեն Պսակին չորեքշաբթի լրագրողներին ասել էր, որ նոր պահանջները տարածվելու են երկրի ողջ բնակչության վրա:
«Նախագահը հայտարարեց վեց քայլի մասին, կլինեն նոր ավելացումներ: Որոշ կետեր կվերաբերվեն թեստավորման հասանելիությանը, մյուսները՝ բնակչության իրավունքներին և դպրոցներում երեխաների պաշտպանվածությանը»,- ասել է Պսակին:
ԱՄՆ նախագահն անցյալ շաբաթ նշել է, որ իր վարչակազմն ուղիներ է փնտրում, որպեսզի երեխաներն ավելի ապահով զգան իրենց դպրոց հաճախելիս, իսկ աշխատողները` գրասենյակ:
«Անշուշտ, կլինեն նոր ավելացումներ, որոնք, անկասկած, կանդրադառնան ողջ երկրի բնակչության վրա, բայց միևնույն ժամանակ մենք աշխատում ենք վիրուսի տարածումը պահել վերահսկողության տակ, որպեսզի հնարավոր լինի վերադառնալ սովորական կյանքի ռիթմին»,- հավելել է Պսակին:
Բայդենի այս քայլերը կապված են երկրով մեկ հոսպիտալացման դեպքերի աճի հետ, որոնցում մեծ թիվ է կազմում վարակելիության բարձր ցուցանիշ ունեցող Դելտա շտամը:
Հարցին, թե արդյոք կանխարգելիչ նոր միջոցառումները կազդեն ամերիկացիների կյանքի որակի վրա, Պսակին պատասխանել է. «Դա կախված է նրանից, պատվաստված է անձը, թե ոչ»:
