«Բժիշկ ջան, շնորհակալություն, շատ լավ լսում եմ…»,- ասում է Ստյոպան՝ լսողական սարքը տեղադրելուց հետո:
Չվերջացող շնորհակալությունների տարափից հնչում է բժշկի պատասխանը.
«Մեր արածը ոչինչ է՝ ձեր արածի դիմաց, մենք ենք ձեզ շնորհակալ»:
35-ամյա Ստյոպա Ասլանյանը 44-օրյա պատերազմի մասնակից է, եղել է սակրավոր: Որպես կամավոր մեկնել է առաջնագիծ առաջին իսկ օրվանից: Կուբաթլուում տանկային ականը դնելիս՝ պայթել է, ընկերը զոհվել է, ինքն էլ ծանր վիրավորում է ստացել: Վնասվել են աչքերը, ականջները և ձեռքը:
«Լավ չէի լսում, բառերը թարս էի հասկանում,- անկեղծանում է Ստյոպան,-«Փոփոխությունն զգացի, շատ հարմար է, սարքը փոքր է ու չի էլ երևում»:
«Արաբկիր» միացյալ մանկական բարեգործական հիմնադրամի և «Արաբկիր» բժշկական համալիրի միջոցով Լոս Անջելեսի «Հայաստան. Լսողության աջակցություն ծրագրի» հիմնադիր Կավուկչյան ընտանիքի և հայ համայնքի բարերարների աջակցությամբ Արցախյան 3 պատերազմի մասնակցած՝ ավելի քան 150 շահառու՝ հոկտեմբերի 1-ից 4-ը ստացավ նորագույն տեխնոլոգիայի թվային լսողական սարք:
Արաբկիր միացյալ մանկական բարեգործական հիմնադրամի միջազգային ծրագրերի համակարգող Լիանա Սահակյանը մեզ հետ զրույցում ասաց, որ սա թվով 5-րդ միջոցառումն է, 2017 թ-ից սկսած: Այս տարիների ընթացքում Հայաստանում և Արցախում ապրող 4700 անձի տրամադրել են լսողության սարք:
Այս տարվա շահառուներին գտնելու համար դիմել են ՀՀ պաշտպանության, աշխատանքի եւ սոցիալական հարցերի նախարարություններին, հիվանդանոցներին ու անհատներին: Փորձել են հավաքագրել ծրագրի բոլոր շահառուների տվյալները: Լիանա Սահակյանի խոսքով, կատարել են նախնական զննում՝ կարիքի գնահատում և առանձնացրել սարքի կարիք ունեցող 150 շահառուի:
Երևանում են ԱՄՆ-ից, Սինգապուրից, Ավստրիայից, Հորդանանից եկած մասնագետները, որոնք նաև կվերապատրաստեն տեղի անձնակազմին, որպեսզի հետո էլ շարունակեն սպասարկել դիմողներին:
Բոլոր սենյակներում իրարանցում է. մասնագետները բարեհամբույր ու համբերատար սպասարկում են, իսկ տղաները անթաքույց ուրախությամբ ու շնորհակալությամբ լսում նրանց: Մոտենում ենք վերջին սենյակին, որտեղ աշխատակիցները տղաներին մանրամասն ներկայացնում են սարքի օգտագործումն ու խնամքը:
Ժամկետային զինծառայող Գագիկ Խաչատրյանը հետաքրքրությամբ և ուշադրությամբ լսում է մասնագետին, փորձում մտապահել բոլոր ասածները: Չէ՞ որ այդ փոքրիկ սարքն է իրեն փոխանցելու շրջապատի այդչափ կարևոր ու հարազատ ձայները, ուրեմն՝ անհրաժեշտ է ճանաչել ու ճիշտ վարվել այդ նոր առարկայի հետ: Փորձարկելուց հետո մեզ պատմում է, որ վիրավորում ստացել է Ջրականում, մեքենային հարվածել է ԱԹՍ-ն, ընկերը զոհվել է, ինքն էլ ուղեղի ցնցումով տեղափոխվել Սիսիանի հոսպիտալ, որտեղ էլ պարզել է, որ պայթել է նաև ականջի թաղանթը: Հետագա վիրահատությունը ամբողջությամբ չի լուծել խնդիրը, ականջում դեռ խշշոց կա, իսկ լսողությունն էլ շատ ցածր է. ասում է՝ չի լսում կողքիններին: Գագիկի ծառայությանը դեռևս 10 ամիս կա, այս պահին դեռ բուժման փուլում է, բայց անհամբեր է, թե երբ պետք է վերադառնա զինվորական շարք, շարունակի ծառայությունը:
Նշենք նաև, որ գործում է նաև սարքերի հետխնամքի կենտրոն, որևէ խնդրի առաջացման դեպքում շահառուները կարող են դիմել և կարգավորել սարքը: