ՀՀ առողջապահության նախարարության մոր և մանկան առողջության պահպանման վարչության պետ Նունե Փաշայանը ներկայացրեց մանկական ծառայությունների բարեփոխման ծրագիրը:
Նրա խոսքով, առողջապահության նախարարությունում ձևավորվել է աշխատանքային խումբ, որում ընդգրկված են մանկաբույժներ, ոլորտի պատասխանատուներ և մասնագետներ: Առաջին նիստն արդեն կայացել է, որի ժամանակ վերհանվել են այն բոլոր հարցերը, որոնց լուծման շնորհիվ կապահովվի մանկական ծառայության ավելի արդյունավետ աշխատանքը՝ թե՛ առողջության առաջնային պահպանման օղակում, թե՛ ստացիոնարում:
«Խնդիրներից մեկն, օրինակ, ստացիոնար ծառայության գերծանրաբեռնվածություն է, առավել ևս սեզոնային վարակների ակտիվացման շրջանում և ԱԱՊ (առողջության առաջնային պահպանման) օղակի արդյունավետության բարձրացումը»,-ասաց Նունե Փաշայանը:
Ըստ նրա, հստակեցվելու է յուրաքանրյուր օղակի պատասխանատվության սահմանը, ինչի համար կմշակվեն չափորոշիչներ, որոնք թույլ կտան առաջնային օղակին զբաղվել նրանով, ինչի համար այն կոչված է. դա կանխարգելիչ աշխատանքն է և թեթև հիվանդությունների բուժումը տնային պայմաններում. «Ինչպես գիտենք, երեխաների հիվանդությունների մոտ 80 տոկոսը հնարավոր է բուժել տնային պայմաններում, այսինքն՝ ԱԱՊ մակարդակում, և միայն ծանր հիվանդները պետք է գնան ստացիոնար»,-նշեց Նունե Փաշայանը:
Նունե Փաշայանը ասաց, որ կվերազինվեն ամբուլատոր ծառայությունները, կիրականացվի մանկական անկետայի թվայնացում, ինչը կկրճատի ամբուլատոր օղակի թղթային աշխատանքն ու կբարելավի աշխատանքի որակը, և ընդգծեց, որ ամբուլատոր օղակի բժիշկները կվերապատրաստվեն և կաշխատեն նոր մշակված ուղեցույցներով:
Հավելենք, որ բարեփոխումները իրականացվելու են ինչպես 2021-2026 թթ-ի առողջապահության նախարարության ծրագրի, այնպես էլ նախարարության ընթացիկ աշխատանքների շրջանակներում: