Քնի խանգարումների, բուժման եղանակների և քնի հիգիենայի մասին ներկայացնում է նյարդաբանության գծով ՀՀ ԱՆ խորհրդատու, նյարդաբան, սոմնոլոգ Սամսոն Խաչատրյանը:
Ի՞նչ է անքնությունը
Անքնությունը քնով անցնելու կամ քունը պահպանելու դժվարությունն է՝ քնի համար անհրաժեշտ պայմանների առկայության դեպքում:
Քնի խանգարումներն են
Քնի հետ կապված շարժողական խանգարումներ, կենտրոնական գերքնության խանգարումներ (հիպերսոմնիա), անքնություն (ինսոմնիա), քնի հետ կապված շնչառական խագարումներ, ցիրկադային ռիթմի խանգարումներ, քնի հետ կապված վարքային խանգարումներ (պարասոմնիաներ):
Կա բուժման 2 եղանակ
Անքնությունը բուժվում է երկու տարբերակով՝ դեղորայքային և ոչ դեղորայքային: Անքնության դեղորայքային և ոչ դեղորայքային բուժումն իրականացվում է մասնագետի հետ միասին: Պետք չէ զբաղվել ինքնաբուժմամբ՝ անցանկալի հետևանքներից և անարդյունավետությունից խուսափելու համար:
Գոյություն ունեն քնի հիգիենայի կանոններ, որոնց պետք է հետևել:
Ի՞նչ անել
Պետք է ստեղծել քնելու, արթնանալու հստակ ռեժիմ: Կարևոր է քնել և արթնանալ միևնույն ժամերին՝ անկախ աշխատանքային և հանգստյան օրերից:
Քնեք մութ սենյակում՝ պահովելով միջին սենյակային ջերմաստիճան:
Ի՞նչ չանել
Խուսափեք նյարդային համակարգը և հոգեհուզական դաշտը ակտիվացնող գործողություններից՝ քնելուց 2 ժամ առաջ: Ցերեկային ժամերին մի քնեք: Սա հատկապես բացասաբար կարող է անդրադառնալ այն մարդկանց քնի վրա, ովքեր ունեն անքնություն: Երեկոյան ժամերին մի օգտագործեք կոֆեին , հատկապես 17:00-ից հետո: Մի քնեք քաղցած կամ լիքը ստամոքսով: Երեկոյան ժամերին խուսափեք օգտագործել սպիտակուցներ և ճարպեր պարունակող դժվարամարս սնունդ: Ալկոհոլը բացասաբար է ազդում քնի որակի վրա: Այն բերում է գիշերվա ընթացքում պարբերաբար արթնացումների և առավոտյան քնից չհագեցած արթնանալուն: Հրաժարվեք համակարգիչներից, սմարթֆոններից և նման այլ սարքերից՝ քնելուց առնվազն 1 ժամ առաջ: