Ինչպե՞ս խուսափել աղիքային վարակիչ հիվանդություններից
2022-06-20 Աղիքային վարակիչ հիվանդությունները տարածվում
են ջրի, սննդի միջոցով, ինչպես նաև կենցաղակոնտակտային ճանապարհով:
Սննդամթերքը բարենպաստ պայմաններում վարակիչ հիվանդությունների
հարուցիչների համար հանդիսանում է սննդային միջավայր՝ նպաստելով դրանց աճմանը և բազմացմանը:
Ամռանը լավ չլվացված մրգերը և բանջարեղենը, համապատասխան պայմաններում չպահված
սննդամթերքը, ոչ ճիշտ պատրաստված ուտեստներն ավելի հաճախ են դառնում աղիքային վարակիչ
հիվանդությունների բռնկումների առաջացման պատճառ:
Աղիքային վարակիչ հիվանդություններով առավել հաճախ հիվանդանում են երեխաները, տարեցները, քրոնիկ հիվանդություններ ունեցող անձինք, որոնց իմուն համակարգը թույլ է:
Ինչպե՞ս խուսափել աղիքային վարակիչ հիվանդություններից
Աղիքային վարակիչ հիվանդություններից խուսափելու
համար խորհուրդ է տրվում հաճախակի լվանալ ձեռքերն օճառով, միրգ-բանջարեղենն օգատգործելուց
առաջ մանրակրկիտ լվանալ հոսող ջրով՝ առնվազն 2-3 րոպե, սննդամթերքը պահել փակ տարաներում
աղտոտումից խուսափելու համար, շուտ փչացող սննդամթերքը պահել սառնարանում, խուսափել
գնել սննդամթերք, որը վաճառվում է դրա համար չնախատեսված վայրերում, հատկապես փողոցներում,
չլողալ լողալու համար չնախատեսված ջրավազաններում:
Աղիքային վարակիչ հիվանդությունների ախտանշանների
(ջերմության բարձրացում, սրտխառնոց, փսխում, ցավ որովայնի շրջանում, լուծ, ընդհանուր
թուլություն և այլն) առկայության դեպքում անհապաղ
դիմեք բժշկի:
