44 օրյա պատերազմում զոհվածների ընտանիքներում ծնվել է 20 երեխա
2022-07-22«Անպտղության հաղթահարման ծրագրի շրջանակում արդյունքները տարեցտարի բարելավում են, ավելանում է ֆինանսավորումը և բուժհաստատոթյունները կարողանում են սպասարկել ավելի շատ շահառուների»,-ասաց Առողջապահության նախարարության Մոր և մանկան առողջության պահպանման վարչության պետ Նունե Փաշայանը: Վերջինիս խոսքով, 6 ամսվա կտրվածքով ծնվել է 44 երեխա և արձանգրվել է 104 հղիություն. «Եթե նախորդ տարվա ընթացքում սպասարկվել է 917 շահառու, ապա՝ միայն այս տարվա առաջին կիսամյակում արդեն 577 շահառու»:
Ծրագիրը բաղկացած է հետևյալ բաղադրիչներից՝
- Անպտուղ զույգերի պատճառագիտության ախտորոշում, ( այն իր մեջ կարող է ներառել նաև վիրահատական միջամտություններ, և երբեմն հղիությունը տեղի է ունենում հենց այս փուլում, վիրահատությունից հետո),
- Արհեստական սերմնավորում,
- Արտամարմնային բեղմանավորում
- Ներպատվաստում արգանդի խոռոչում
Ծրագրով նախատեսված է 2 փորձ. արտամարմնային բեղմնավորման առաջին փորձը իրականացվում է ամբողջությամբ անվճար, իսկ 2-րդ փորձը՝ 50 տոկոս զեղչով:
Եթե զույգը ճանաչվել է շահառու, ապա՝ բոլոր ծախսերը իրականացվում են պետական պատվերի հաշվին. այն իր մեջ ներառում է հետազոտությունը, բեղմնավորումը, ներպատվաստումը արգանդի խոռոչում:
Ծրագրի շահառու կարող են դառնալ՝
- Հաշմանդություն ունեցող անձինք ( և՛ կին, և՛ տղամարդ) , եթե, իհարկե, հաշմադությունը չի խոչընդտում կնոջ հղիության կրելուն,
- Սահմանամերձ բնակավայրերի բնակիչները
- Զինծառայողները կամ զինծառայողներին հավասարեցված անձինք,
- 44 օրյա պատերազմում զոհվածների ծնողները, իսկ 2022 թ-ին ավելացվեց նաև դատական կարգով անհայտ կորած ճանաչվածների ծնողները և 44 օրյա պատերազմից հետո շփման գծում զոհվածների ծնողները
Նունե Փաշայանն ասաց, որ շահառուների վերջին խմբի համար կատարվում է բացառություն, 2-րդ փորձի ամբողջ ծախսը ևս հոգում է պետությունը:
Զոհվածների ընտանիքներում ծնվել է արդեն 20 երեխա և միայն առաջին կիսամյակում 31 նոր հղիություն է արձանագրվել:
Փաշայանի խոսքով, անպտղության հիմնական խնդիրները բազմաթիվ են. ՄԱԿ-ի բնակչության կողմից կատարված ուսումնասիրությունը ցույց է տալիս, որ անպտղությունը բավականին բարձր է տղամարդկանց մոտ, կանանց շրջանում 19 տոկոս նվազել է: Տղամարդկանց մոտ պատճառը հիմնականում սեռավարակներն են, իսկ կանանց մոտ՝ հղիության արհեստական ընդհատումները:
Հավելենք, որ 2022 թ-ի համար նախատեսված է 917 միլիոն դրամ, իսկ ծրագրի մեկնարկից (2019 թ.) ի վեր ծնվել է 170 երեխա:
Վերարտադրողական առողջության և վերարտադրողական իրավունքի մասին օրենքը նախատեսում է, որ վերարտադրողական օժանդակ տեխնոլոգիաներից կարող են օգտվել մինչև 53 տարեկան զույգերը:
