ԱՆ-ն հաստատել է հեպատիտ Ց-ով պացիենտների բուժման կարգը
2022-07-29ՀՀ առողջապահության նախարարությունը հայտնում է, որ վիրուսային հեպատիտ Ց-ով պացիենտների բուժումը կազմակերպելու նպատակով հաստատված կարգի համաձայն` անվճար կտրամադրվեն ուղղակի ազդող հակավիրուսային` «Սոֆոսբուվիր/Վելպատասվիր» համակցությամբ դեղերը: Այսինքն, այլևս անհրաժեշտություն չկա հանձնելու վիրուսի գենոտիպի որոշման հետազոտություն:
Բժշկական օգնությունը և սպասարկումը տրամադրվում է 18 տարեկանից
բարձր հեպատիտ Ց ախտորոշմամբ պացիենտներին և լյարդի ֆիբրոզ 0–4 (Child-Pugh
A, MELD <20) ունեցող պացիենտներին լաբորատոր-գործիքային ախտորոշիչ հետազոտությունների
արդյունքների հիման վրա.
- հեպատիտ Ց վիրուսի հայտնաբերում (դրական) որակական պոլիմերազային
շղթայական ռեակցիայի (ՊՇՌ) մեթոդով,
- ֆիբրոզի աստիճանի որոշում՝ լյարդի էլաստոգրաֆիա (ֆիբրոսկան) կամ
APRI կամ FIB-4, ընդ որում, 3-րդ և 4-րդ աստիճանի ֆիբրոզի դեպքում որոշվում է նաև
AFP,
- արյան ընդհանուր հետազոտություն լեյկոբանաձևով, կենսաքիմիական հետազոտություն
(բիլիռուբին ընդհանուր/կապված, ԱԼՏ, ԱՍՏ, ալբումին, գլյուկոզ, կրեատինին, պրոտրոմբինային
ժամանակ/ինդեքս/INR),
- HBsAg կամ հակա-HBc,
- որովայնի խոռոչի օրգանների ուլտրաձայնային հետազոտություն:
Այս կարգի շրջանակներում վիրուսային հեպատիտ Ց-ով պացիենտների վարումը,
դեղատոմսի տրամադրումը և հսկողությունն իրականացվում է բժիշկ-մասնագետի կողմից հետևյալ
բժշկական կազմակերպություններում`Ինֆեկցիոն հիվանդությունների ազգային կենտրոն, «Միքայելյան»
համալսարանական հիվանդանոց, «Աստղիկ» ԲԿ, «Էրեբունի» ԲԿ, «Նաիրի» ԲԿ, «Արմենիա» հանրապետական
ԲԿ, «Էլիտ-Մեդ» ԲԿ, «Վիոլետա» բժշկական կենտրոն, «Նիկոմեդ» ԲԿ:
Նշված չափանիշներին համապատասխանող պացիենտներին բժշկի կողմից տրվում
է դեղատոմս, որի հիման վրա վերջինս ԱՆ «Ինֆեկցիոն հիվանդությունների ազգային կենտրոն»
ՓԲԸ-ից ստանում է անհրաժեշտ դեղերը: Յուրաքանչյուր պացիենտի տրամադրվելու է ամսական
1 տուփ` ըստ բուժման կուրսի, որի տևողությունը 12 շաբաթ է:
Նշենք, որ 2022 թ-ին Հայաստանում հեպատիտ Ց-ի դեմ բուժում է ստացել
517 պացիենտ:
Հիշեցնենք, որ հեպատիտները փոխանցվում են սեռական ճանապարհով, արյան միջոցով` թմրամիջոցների գործածում, ինվազիվ միջամտություն (բժշկական և ոչ բժշկական` դաջվածք, մատնահարդարում, ոտնահարդարում, փիրսինգ և այլն), դրական դեպք` մորից երեխային, երբեմն նաև` կենցաղ-կոնտակտային ճանապարհով:
