Աշխարհում սրտանոթային հիվանդություններից մահացությունը կազմում է շուրջ 16 տոկոս
Սրտանոթային հիվանդությունները առողջապահական համակարգի
գերակա հիմնախնդիրներից մեկն է: Հիվանդացության և մահացության ցուցանիշները ամենաբարձրն
են բոլոր երկրներում: Ըստ ԱՀԿ տվյալների, ամբողջ աշխարհում յուրաքանչյուր տարի սրտանոթային
հիվանդություններից մահացությունը կազմում է շուրջ 16 տոկոս: Մահացության բարձր ցուցանիշը
բնորոշ է ավելի միջին ու ցածր եկամուտ ունեցող երկրներին:
Եթե կանխագելման և բուժման միջոցառումներ չիրականացվեն, ապա, ըստ ԱՀԿ-ի կանխատեսումների, մինչև 2030 թ-ը կգրանցվի շուրջ 23 մլն մահվան դեպք:
Հայաստանում սրտանոթային հիվանդություններից մահացությունը
կազմում է 48.3 տոկոս
«Հայաստանում սրտանոթային հիվանդություններից մահացությունը ևս առաջին տեղում է՝ կազմելով 48.3 տոկոս»,- «Արմենպրես» լրատվական գործակալության տաղավարում նշեց Առողջապահության ազգային ինստիտուտի տեղակալ Դիանա Անդրեասյանը: Նրա խոսքով, սակայն նախորդ տարվա համեմատ եղել են մահացության թվերի նվազեցում 525 դեպքով (2021 թ-ին եղել է16 589 դեպք, 2020 թ-ին՝ 17 114): «Պետք է նշեմ, որ մինչև 2019 թ-ը ունեինք թվերի նվազեցման միտում, սակայան 2020 և 2021 թթ-ի իրադարձությունների հետևանքով եղավ մի փոքր ցուցանիշի աճ»,- նշեց նա:
Տղամարդկանց շրջանում սրտանոթային հիվանդություններից
մահացությունը 2 անգամ բարձր է
Անդրադառնալով կանանց և տղամարդկանց շրջանում սրտանոթային հիվանդություններից մահացության դեպքերի հարաբերակցությանը, Դիանա Անդրեասյանը նշեց, որ մինչև 70 տարեկան տղամարդկանց շրջանում մահացությունը շուրջ 2 անգամ բարձր է, քան՝ կանանց, «Սա խոսում է այն փաստի մասին, որ տղամարդիկ, մինչև 70 տարեկան և առավել ևս 35-65 տարիքային խումբը, համարվում է ռիսկային: Պատճառն այն է, որ տղամարդկանց վարքագիծը ավելի ռիսկային է. յուրքանչյուր 2-րդ տղամարդ ծխում է, զարկերակային բարձր ճնշման տարածվածությունը, ֆիզիկական թերակտիվությունը, ավելցուկային քաշը՝ ճարպակալումը, որը բնակչության շրջանում կազմում է 48 տոկոս և աղի չարաշահումը»:
10 քայլ՝ առողջ սիրտ ունենալու համար
Եղե՛ք ֆիզիկապես ակտիվ, մարզվե՛ք շաբաթական առնվազն
150 րոպե:
Շաքարային դիաբետից խուսափելու համար պարբերաբար
ստուգե՛ք արյան շաքարի մակարդակը և սահմանափակե՛ք վերամշակված ածխաջրերի օգտագործումը:
Դադարեցրե՛ք ծխելը:
Նվազեցրե՛ք ալկոհոլի օգտագործումը
Խուսափե՛ք հագեցած ճարպերից. դրանք նպաստում են անոթների
խցանմանը:
Սնվե՛ք առողջ, օրական օգտագործե՛ք մինչև 500 գրամ
միրգ և բանջարեղեն:
Կառավարե՛ք ձեր սթրեսը, հաճախ հանգստացե՛ք:
Վերահսկե՛ք և կարգավորեք արյան բարձր ճնշումը և պարբերաբար չափեք:
Վերահսկե՛ք ձեր քաշը:
Առողջ լինելու համար քնեք միջինում 7 ժամ: