Սուրճի ամենօրյա օգտագործման բացասական կողմերը, ըստ Mayo կլինիկայի
2021-01-13Եթե դուք սուրճի սիրահար եք, արդեն գիտեք, որ օրվա ընթացքում չորրորդ կամ հինգերորդ բաժակից հետո կարող եք ավելի նյարդային և անհանգիստ դառնալ։ Սակայն արդյո՞ք գիտեիք, որ սուրճի կանոնավոր օգտագործումը ժամանակի ընթացքում կարող է առաջ բերել սուր նյարդային վիճակ եւ ջղաձգություն, ինչի հետևանքով հնարավոր է մկանների զգայունության մասնակի կորուստ: Հնարավոր է նաև չկարողանաք վերահսկել միզարձակումը։ Այս ամենը օրական չորս և ավելի բաժակ սուրճ (կամ 400 մգ կոֆեին) օգտագործելու կողմնակի լուրջ ազդեցություններն են։ Եթե այս ախտանշաններից որեւէ մեկը ձեզ ծանոթ է, իմացեք, որ միգուցե ժամանակն է նվազեցնել կոֆեինի օգտագործումը:
«Victoria health news»-ը ներկայացնում է ԱՄՆ-ի Վիսկոնսին նահանգում գործող Mayo կլինիկայի ուսումնասիրությունը:
Գլխացավ
Երբ մարդը կանոնավոր կերպով սուրճ է օգտագործում, օրգանիզմը դրանից
կախվածություն է ձեռք բերում։ Սուրճի ընդունումը
դադարեցնելու ընթացքում կարող են առաջանալ կոֆեինկախյալ գլխացավեր, որոնք կարող են տևել մի
քանի շաբաթ, քանի որ օրգանիզմին ժամանակ է պետք հարմարվելու կոֆեինի պակասին։
Հաճախամիզություն կամ միզարձակումը վերահսկելու անկարողություն
Կոֆեինը միզամուղ է, ինչը նշանակում է, որ այն կարող է խթանել միզապարկի աշխատանքը և առաջացնել հաճախամիզություն: Եթե ձեզ մոտ նկատել եք այս ախտանշանը, լավ կլինի վերանայել սուրճի սպառման օրական չափաբաժինը: Խուսափեք կոֆեինի, ալկոհոլի և թթու կերակուրների չարաշահումից, քանի որ դրանք խթանում են միզապարկի աշխատանքը։
Հաճախասրտություն (տախիկարդիա)
Մի շարք երևույթներ կարող են առաջացնել հաճախասրտություն, երբ սրտի զարկերի քանակը մեկ րոպեում գերազանցում է 100-ը, ինչը կապված չէ ֆիզիկական ակտիվության հետ,- նշում են Mayo կլինիկայի մասնագետները։ Այնպիսի ախտանշանները, ինչպիսիք են նյարդային վիճակը, արյան ցածր ճնշումը, վահանաձեւ գեղձի գերակտիվությունը, ծխելը և հանկարծակի սթրեսը կոֆեին պարունակող ըմպելիքների չարաշահման հետևանք են։
Մկանային դող
«Մկանային դողը» նյարդաբանական խանգարում է, որն արտահայտվում է
մարմնի դողով, որը մարդը չի կարողանում կառավարել։ «Դողում են հիմնականում ձեռքերը, երբ մարդը կատարում
է պարզ գործողություններ, օրինակ երբ բաժակից ջուր է խմում», - նշում է Mayo կլինիկայի նյարդաբան Քելլի Թորնսթրոմը: Դող կարող է առաջանալ կոֆեինի չարաշահման արդյունքում: Մասնագետները
խորհուրդ են տալիս նվազեցնել ալկոհոլի և կոֆեին պարունակող ըմպելիքների չարաշահումը,
քանի որ դրանք կարող են հաճախացնել դողի ինտենսիվությունը։
Անքնություն
Անքնությունից խուսափելու համար Mayo կլինիկայի մասնագետները խորհուրդ են տալիս խուսափել կոֆեին պարունակող ցանկացած տեսակի մթերքից` քնելուց 10 ժամ առաջ: Նույնը վերաբերում է այլ խթանիչներին: Նիկոտինի և կոֆեինի խթանիչ ազդեցությունները տևում են մի քանի ժամ և կարող են անքնության պատճառ դառնալ։
Նյարդայնություն
Սուրճի չարաշահումը կարող է առաջացնել սուր նյարդային վիճակ եւ ջղաձգություն։
Ուշադիր եղե՛ք ձեր առողջությանը, քանի որ ցանկացած փոփոխություն, որը ձեզ անհանգստացնում է, խոսում է այն մասին, որ ձեր օրգանիզմում ինչ-որ բան այն չէ։
Եվ հիշե՛ք․ ամեն բան լավ է, երբ չես չարաշահում։
