«Անոթային խնդիրների դեպքում պատվաստումը հակացուցում չի». Անոթային վիրաբույժ Տիգրան Քամալյան
2021-12-09ՀՀ առողջապահության նախարարության ներկայացրած տվյալներով՝ դեկտեմբերի 6-ի դրությամբ ՀՀ-ում կատարվել է 1 352 805 պատվաստում, որից`առաջին դեղաչափ` 835 816, երկրորդ դեղաչափ` 516 989:
Հիշեցնենք, որ դեկտեմբերի 1-ից սկսեց գործել նոր փոփոխությունը, ըստ որի՝ աշխատակիցները գործատուին ՊՇՌ թեստը պետք է ներկայացնեն 7 օրը մեկ պարբերականությամբ: Իսկ 2022 թ-ի հունվարի 1-ից նախատեսվում է, որ հանրային սննդի վայրեր, մշակութային միջոցառումներին քաղաքացիների մուտքը միայն ՊՇՌ բացասական թեստով կամ պատվաստված լինելու հավաստագրով է թույլատրվելու:
Ինչևէ, պատվաստվողների թիվը Հայաստանում թեև դեռևս գոհացուցիչ չի, բայց վերը թվարկած սահմանափակումները մի նոր ալիք կհաղորդեն պատվաստման գործընթացին: Չպատվաստվել ցանկացողների մեջ շատ են մարդիկ, որոնք, ունենալով առողջական այս կամ այն խնդիրը, խուսափում են պատվաստվելուց, որքան էլ որ մասնագետները բարձրաձայնում են, որ առաջինը պետք է պատվաստվեն ռիսկային խմբերում գտնվողները՝ վարակվելու դեպքում հիվանդության ծանր ընթացքը կանխելու համար: Սակայն, միևնույն է, շատերը դեռ կանգնած են՝ պատվաստվե՞լ, թե՞ ոչ երկընտրանքի առջև: Դրանց թվում են նաև անոթային խնդիրներ ունեցողները: Ահա այդ հարցը պարզելու համար «Victoria health news»-ը զրուցել է անոթային վիրաբույժ Տիգրան Քամալյանի հետ:
Բժիշկ Քամալյան, արդյո՞ք անոթային խնդիրների առկայության դեպքում հակացուցված է պատվաստվելը:
-Ինչպես բոլոր մնացած հիվանդությունների դեպքում է, երբ այդ պահին չկա սուր պաթոլոգիա, ապա՝ այս դեպքում էլ հակացուցում չկա: Քրոնիկի ժամանակ հակացուցում չկա: Կան որոշակի ռիսկի խմբեր, որոնց դեպքում պետք է նշանակել պրոֆիլակտիկ դեղեր՝ հակամակարդիչներ՝ մոտավորապես 10 ից 14 օր:
Իսկ ո՞ր դեպքում է հակացուցված պատվաստումը:
-Որպես այդպիսին հակացուցում չկա: Պարզապես, եթե կա սուր թրոմբոզ, պատվաստումը հետաձգում ենք մինչև բուժման ավարտը: Սակայն բոլոր դեպքերում, ռիսկի գնահատումը պետք է կատարի բժիշկը: Այդ իսկ պատճառով, եթե գիտեք, որ ունեք անոթային խնդիր, անպայման խորհրդակցեք անոթաբանի հետ:
