Ոչ վարակիչ հիվանդություններից մահվան դեպքերի մեջ մեծ թիվ են կազմում սրտանոթային հիվանդությունները: Իսկ հատկապես գարնանը նկատվում է սրտանոթային հիվանդությունների սրացում: Սրտաբանության գծով ԱՆ խորհրդատու Համլետ Հայրապետյանն ասում է, որ այն կապված է, ինչպես բնության մեջ տեղի ունեցող փոփոխությունների, այնպես էլ՝ մարդու օրգանիզմում տարբեր ֆիզիոլոգիական պրոցեսների հետ, որը բերում է քրոնիկ հիվանդությունների սրացման: Սրտանոթային հիվանդությունների պարագայում, դա առաջին հերթին վերաբերվում է զարկերակային հիպերտենզիայով, սրտի իշեմիկ հիվանդությամբ և առիթմիաներով տառապող հիվանդներին:
Սրտաբանը՝ սրտանոթային հիվանդությունների սրացումը կապում է ոչ միայն առողջապահական, այլ սոցիալական խնդիրների հետ: Կարծում է, որ այս դեպքում մեծ է առաջնային օղակի անելիքը. «Առաջնային օղակը պետք է ճիշտ իրականացնի քրոնիկ սրտային հիվանդություններով տառապողների վարման գործընթացը: Հսկողության տակ պահի այս հիվանդների զարկերակային ճնշումը, սիրտ-անոթային տարբեր պարամետրեր և անհրաժեշտության դեպքում կատարի կորեկցիաներ՝ բուժման և վարման մեջ»:
Անդրադառնալով տարիքային առաձնհատկություններին, մասնավորապես սրտանոթային տարբեր հիվանդությունների երիտասարդացմանը, նշեց, որ դա մի կողմից համաշխարհային միտում է՝ սոցիալական և տարբեր գործոնների ազդեցությամբ, իսկ մյուս կողմից, կարծում է, որ, պարզապես, լավացել է ախտորոշումը. «Մասնավորապես մեր երկրում, տարբեր ախտորոշիչ նորագույն մեթոդների, բժշկական, առողջապահական ծրագրերի ներդրումը բարելավել է հիվանդությունների ախտորոշումը և հիվանդությունների վաղ հայտնաբերումը»:
Համլետ Հայրապետյանը նշեց նաև, որ առողջապահության նախարարի որոշմամբ՝ ձևավորվել է սրտանոթային հիվանդությունների կառավարման խորհուրդ, որի գործունեության նպատակն է մոտակա տարիների համար պատրաստել առաջարկություններ, պետական ծրագրեր, բարելավել եղած ծրագրերն ու մարզային սրտանոթային ծառայությունները: