Նորություններ Հայաստանի առողջապահության, բժշկական կենտրոնների, բժիշկների եւ հայ բժշկության մասին


Համավարակը հանգեցրել է հակաբիոտիկների չարաշահման.  ԱՀԿ-ն հայտարարել է հակաբիոտիկների իրազեկման շաբաթ

Համավարակը հանգեցրել է հակաբիոտիկների չարաշահման. ԱՀԿ-ն հայտարարել է հակաբիոտիկների իրազեկման շաբաթ

2021-11-23


   Առողջապահության համաշխարհային կազմակերպության (ԱՀԿ)  որոշմամբ՝  աշխարհում անցկացվում է  հակաբիոտիկների իրազեկման շաբաթ:

  Հայաստանում հակաբիոտիկակայունության, հակաբիոտիկների կիրառման չարաշահումների մասին «Արմենպրես» լրատվական գործակալության տաղավարում  խոսել են   ԱՆ ՀՎԿԱԿ  համաճարակաբանության վարչության պետ Ռոմելլա Աբովյանը և ՀՀ առողջապահության նախարարության ընտանեկան բժշկության գծով խորհրդատու Սամվել Հայրումյանը:

Կորոնավիրուսով պայմանավորված չարաշահվում  է հակաբիոտիկների կիրառումը  

  Սամվել Հայրումյանի խոսքով, համավարակի  սկզբնական շրջանում ուղեցույցում հիմնական դեղերի մեջ ընդգրկված էր  «Ազիթրոմիցին» հակաբիոտիկը,  սակայն 1-2 ամիս անց բազմաթիվ հետազոտություններն ու վիճակագրական տվյալները ցույց տվեցին, որ  90 տոկոս կորոնավիրուսային թոքաբորբերի դեպքում  բորբոքումը պայմանավորված է միայն վիրուսով, հետևաբար,  հակաբիոտիկ նշանակելու կարիք չկա:

   Միջազգային ուղեցույցներում  կան  հստակ տվյալներ, որ գրեթե 10 տոկոս թոքաբորբերի  դեպքում է կարիք լինում նշանակել հակաբիոտիկներ, երբ կա երկրորդային բակտերիալ վարակի  կասկած: ՀՀ-ում նույնպես  ԱՆ կողմից հրատարակված  է համապատասխան  գործելակարգ և առողջապահության նախարարի հրաման:

  Ռոմելլա Աբովյանը նշեց, որ  հակաբիոտիկների կիրառման հետևանքով կայունության զարգացումը գլոբալ խնդիր է ինչպես ամբողջ աշխարհում, այնպես էլ ՀՀ-ում. «Առողջապահության նախարարությունը դեռևս 2015 թ-ից իրականացրել է հակամանրէային դեղերի վերահսկման  և կանխարգելման ազգային ծրագրի ներդրումը, որն ավարտվել է 2020 թ-ին և այս պահի դրությամբ կառավարության ծրագրում ներառված է նոր ռազմավարական ծրագրի մշակման միջոցառումը, որտեղ ներառվելու են նաև այլ գերատեսչություններ»:

   Անդրադառնալով վիճակագրական տվյալներին, Ռ. Աբովյանն ասաց, որ  իրականացված  մի շարք ուսումնասիրությունները, որոնք  պարզելու են,  թե ինչպիսի կայուն շտամեր կան ՀՀ-ում, այդ թվում հոսպիտալային շտամեր, գտնվում են  ամփոփման փուլում: Սակայն,   «Դեղերի գործակալության» կողմից իրականացված  ուսումնասիրության արդյունքները փաստում են, որ   2020-2021 թթ-ին մեծ սպառում է ունեցել «Ազիթրոմիցին»-ը և  հակասնկային «Ֆլյուկոնազոլ»  դեղամիջոցը:

Վիրուսային  հիվանդությունները  բուժվում են  հակավիրուսային դեղորայքով, այլ ոչ թե  հակաբիոտիկներով

  Ռոմելլա  Աբովյանը   հիշեցրեց, որ  ինչպես ԱՀԿ-ն, այնպես էլ ՀՀ առողջապահության նախարարությունը,  բազմիցս հորդորել են  հակաբիոտիկների հետ չկիրառել «ֆլյուկոնազոլ»  դեղամիջոցը. «Հիմնականում գլոբալ խնդիրն այն է, որ այդպիսի հակաբիոտիկային դեղամիջոցներ կիրառելու արդյունքում մանրէները ձեռք են բերում կայունություն և կարող է գալ մի ժամանակ, որ կսպառվեն  հիմնական հակաբիոտիկների խումբը և սովորական  վարակիչ հիվանդությանը օգնել չկարողանալու  պարագայում,   կունենանք  անգամ մահվան դեպքեր»:

  Սամվել Հայրումյանն էլ հավելեց, որ  ֆարինգիտների   85 տոկոսը կրկին պայմանավորված է վիրուսներով և պետք չի շտապել հակաբակտերիալ դեղեր նշանակել, նույնը նաև  միզուղիների վարակների ժամանակ. «Եթե անհրաժեշտ  է հակաբակտերիալ դեղ նշանակել, պետք է սկսել ամենապարզ միջոցներից (առաջին ընտրության դեղամիջոցներ) , այլ ոչ թե ռեզերվային հակաբիոտիկներից»:

  Հակաբիոտիկակայունությանը նպաստում է նաև անասնապահության և գյուղատնտեսության մեջ մեծ քանակությամբ օգտագործվող հակաբիոտիկները, որը փոխանցվում է մարդուն մսի և բանջարեղենի միջոցով:

  Թեև  ԱՆ  որոշմամբ, որոշ հակաբիոտիկներ վաճառվում են  միայն դեղատոմսով, սակայն  վերահսկման գործընթացը առողջապահության նախարարության լիազորություններից դուրս է.  այն  իրականացնում են համապատասխան տեսչական մարմինները, որը թերևս բավարար չէ, նշեց Ռ. Աբովյանը:

Մասնագետները հորդորեցին՝ կիրառել հակաբիոտիկներ  միայն բժշկի ցուցումով  և նպատակային։


Վերջին նորություններ