Նորություններ Հայաստանի առողջապահության, բժշկական կենտրոնների, բժիշկների եւ հայ բժշկության մասին


Կորոնավիրուսը կարող է փոխանցվել շնչառական մասնիկների միջոցով օդակաթիլային ճանապարհով

Կորոնավիրուսը կարող է փոխանցվել շնչառական մասնիկների միջոցով օդակաթիլային ճանապարհով

2020-09-25

  Ըստ  «Victoria healtհ news»-ի, «CBS News»-ի փոխանցմամբ՝  ԱՄՆ-ի  հիվանդությունների վերահսկման եւ կանխարգելման կենտրոնը թարմացրել է COVID-19-ին վերաբերող իրենց ուղեցույցը, որում նշվում է, որ կորոնավիրուսը կարող է փոխանցվել շնչառական մասնիկների միջոցով օդակաթիլային ճանապարհով, սակայն մի քանի օր անց վերախմբագրել է այս տեղեկատվությունը, նշելով, որ այն դեռեւս վերանայվում է:

  Նախքան տեղեկատվությունը վերախմբագրելը, նորացված ուղեցույցում ասվում էր, որ կորոնավիրուսը հաճախ տարածվում է աէրոզոլների՝ շնչառական կաթիլների կամ փոքր մասնիկների միջոցով, որոնք ձեւավորվում են, երբ վարակված անձը հազում է, փռշտում, երգում, խոսում կամ պարզապես շնչում է, եւ որոնք կարող են օդում մնալ որոշակի ժամանակահատված, ինչի հետևանքով վիրուսը կարող է փոխանցվել այն մարդկանց, ովքեր «անցել են նույն ճանապարհով»։

  Առողջապահության ոլորտի շատ փորձագետներ արդեն մի քանի ամիս է նշում են, որ COVID-19-ը կարող է փոխանցվել ոչ միայն ՄԵԾ կաթիլների, այլ նաև օդակաթիլային ՓՈՔՐ մասնիկների միջոցով, երբ վարակակիր անձը հազում է կամ փռշտում:

  Շատ ապացույցներ կան, որ օդակաթիլային մասնիկները կարող են երկար ժամանակ մնալ օդում եւ տարածվել ավելի քան 6 ոտնաչափ հեռավորության վրա։

  Սակայն երկուշաբթի օրը, երբ ԱՄՆ-ում COVID-19-ից մահացությունների թիվը մոտեցավ 200000-ին, հիվանդությունների վերահսկման եւ կանխարգելման կենտրոնը կրկին թարմացրեց հոդվածը, հեռացնելով օդակաթիլային փոխանցման ռիսկի մասին տեղեկությունները։

  Շատ քիչ թվով հիվանդություններ են համարվում աէրոզոլների միջոցով փոխանցվող' տուբերկուլյոզը, ջրծաղիկը եւ կարմրուկը։ Սակայն ճապոնացի մասնագետները, օրինակ, մի քանի ամսվա ընթացքում եկել են այն եզրահանգման, որ լեփ-լեցուն վայրերում փոքրիկ աէրոզոլային մասնիկները նպաստում են կորոնավիրուսի տարածմանը: Դեռևս փետրվարին Ճապոնիան որդեգրել էր COVID-19-ի՝ օդակաթիլային տարածման դեմ պայքարի ռազմավարությունը՝ բնակիչներին խորհուրդ տալով խուսափել փակ տարածքներից, մարդաշատ վայրերից և սերտ խոսակցություններից։

  Հիվանդությունների վերահսկման եւ կանխարգելման կենտրոնի ղեկավարությունը նաեւ նշում է, որ COVID-19-ով հիվանդ անձը որքան երկար է գտնվում այլ մարդկանց միջավայրում, այնքան բարձր է այդ մարդկանց շրջանում վիրուսի տարածման վտանգը:

  Ուրբաթ օրը Կենտրոնը նաեւ թարմացրեց թեստավորման իր ուղեցույցը, որում նախկինում նշվում էր, որ կորոնավիրուսով հիվանդի հետ շփում ունեցած, սակայն ախտանշաններ չունեցող անձինք թերևս թեստավորում կարող են չանցնել, ինչն առաջացրել էր վրդովմունք բժշկական փորձագետների շրջանում, քանի որ նրանց պնդմամբ՝ ախտանշաններ չունեցող անձինք կարող են հեշտությամբ տարածել վիրուսը։

  Նոր ուղեցույցում մասնավորապես ասվում է. «Վիրուսի անախտանիշ եւ նախասիմպտոմային փոխանցման հանգամանքով պայմանավորված, ըստ այս ուղեցույցի՝ ավելի է մեծանում ախտանշաններ չունեցող, ներառյալ կորոնավիրուսով հիվանդի հետ շփում ունեցած անձանց թեստավորման անհրաժեշտությունը։

  Հանրային առողջապահության շատ փորձագետներ վաղուց խորհուրդ են տալիս, որ նույնիսկ ախտանշաններ չունեցող  անձինք պետք է թեստավորվեն, եթե կասկածում են, որ շփման մեջ են եղել որևէ մեկի հետ, ով COVID-19-ով հիվանդ է եղել: Հուլիս ամսին ԱՄՆ-ի Գիտությունների ազգային ակադեմիայի կողմից հրապարակված հոդվածում նշվում է, որ կորոնավիրուսի դեպքերի մոտ 50 տոկոսը կարող է տարածվել այն անձանց կողմից, ովքեր հիվանդության ախտանշաններ չունեն։


Բժշկական Նորություններ