Նորապսակները, հղիություն պլանավորելու նպատակով, կարող են անվճար հետազոտվել
2022-09-28ՀՀ առողջապահության նախարարությունը հայտնում է, որ ամուսնությունը գրանցելուց հետո 3 ամսվա ընթացքում զույգերը կարող են դիմել իրենց հաշվառման կլինիկա՝ հղիություն պլանավորելու նպատակով խորհրդատվություն ստանալու և անվճար հետազոտվելու համար:
Ծրագրի նպատակն է վաղ հայտնաբերել և բուժել որոշ
հիվանդություններ, ինչպես նաև կանխարգելել և կառավարել ռիսկի այն գործոնները, որոնք
կարող են ազդել ապագա երեխայի առողջության վրա:
Խորհրդատվության և հետազոտությունների մասին տեղեկատվական
թերթիկը տրամադրում են ՔԿԱԳ մարմինները:
Երեխայի առողջության հիմնաքարերից է առողջ հղիություն
պլանավորելը: Ուստի, հղիանալու որոշումը հիանալի առիթ է առողջ կենսակերպի անցնելու,
ծխելը և այլ վնասակար սովորույթները թողնելու համար: Ծխելը դանդաղեցնում է պտղի զարգացումը, հանգեցնում հիպոքսիայի, վաղաժամ ծննդաբերության և բազմաթիվ այլ
բարդությունների։ Պակաս վտանգավոր չէ նաև պասիվ ծխելը։ Ցանկացած ալկոհոլային խմիչքի
օգտագործումը, անգամ ամենափոքր քանակությամբ, բեղմնավորման և հղիության ընթացքում անթույլատրելի
է, քանի որ թափանցում է պտղի արյան մեջ և պատճառ դառնում զարգացման արատների, մտավոր
հետամնացության: Բացի այդ, ալկոհոլի օգտագործումը կարող է հանգեցնել վիժման, մեռելածնության,
վաղաժամ ծննդաբերության:
Անհրաժեշտ է հետևել սննդակարգին։ Պետք է կրճատել
բարձր կալորիականությամբ, ցածր սնուցողականությամբ օժտված մթերքները՝ յուղային և քաղցր
ուտեստները։ Ցանկալի է հարստացնել սնունդը ֆոլաթթվով հարուստ մթերքներով կամ ընդունել
ֆոլաթթվի հաբեր։ Ֆոլաթթուն կանխում է նյարդային խողովակի արատների առաջացումը։ Դրա
համար մինչև հղիությունը և առաջին 3 ամիսների ընթացքում այն պետք է ներառել ռացիոնի
մեջ (օրաբաժնում)։ Ֆոլաթթվով հարուստ են կանաչեղենը (հազար, սպանախ, սիբեխ), կաղամբը,
ծաղկակաղամբը, կանաչ լոբին: Պետք է ընդունել վիտամիններ, որպեսզի նյութափոխանակությունը
լինի նորմալ: Պետք է օգտագործել միայն յոդացված աղ (մինչ հղիությունը օգտագործվածի
չափով), քանի որ յոդի անբավարարությունը պտղի մոտ առաջացնում է նյարդային համակարգի,
մտավոր զարգացման անդառնալի ախտահարումներ, մտավոր և ֆիզիկական ծայրագույն թերզարգացում
(կրետինիզմ, գաճաճություն), խուլ-համրություն, բնածին այլ արատներ:
Անհրաժեշտ է`
- խուսափել ճարպոտ սննդամթերքից և քաղցրավենիքից,
- որքան հնարավոր է շատ օգտագործել մրգեր և բանջարեղեն,
- գեղեցիկ մաշկ ունենալու, արյան նորմալ շրջանառություն
ու մարսողություն ապահովելու համար պետք է օրական ընդունել առնվազն 1,5 լ հեղուկներ:
- Հարկավոր է հետևել քաշին ամբողջ հղիության ընթացքում, որը սովորաբար ավելանում է 10-12 կգ, ընդ որում առաջին եռամսյակում` 1,5-2 կգ, երկրորդում՝ 5,5-6,5 կգ, այսինքն՝ շաբաթական մոտավորապես 0,5 կգ, երրորդ եռամսյակում՝ 4-5 կգ:
